ہندوستان کو شکست، سیریز کیویز کے نام

ہملٹن: نیوزی لینڈ نے روس ٹیلر کی شاندار سنچری کی بدولت چوتھے ایک روزہ میچ میں عالمی نمبر ایک ہندوستان کو سات وکٹ سے شکست دے کر پہلی پوزیشن سے محروم کرنے کے ساتھ ساتھ سیریز بھی 3-0 سے اپنے نام کر لی ہے۔

ہندوستانی کپتان مہندرا سنگھ دھونی نے ٹاس جیت کر پہلے کھیلنے کا فیصلہ کیا جہاں روہت شرما اور کپتان کی 79، 79 اور رویندرا جدیجا کی 62 رنز کی اننگز کی بدولت عالمی چیمپیئن نے اسکور بورڈ پر 278 رنز کا مجموعہ سجایا۔

جواب میں ابتدائی نقصان کے باوجود نیوزی لینڈ نے روس ٹیلر کی سنچری اور کین ولیمسن اور کپتان برینڈن میک کولم کی شاندار بلے بازی کی



بدولت 49ویں اوور میں ہدف تک رسائی حاصل کر لی۔

ٹیلر 112 رنز کے ساتھ ناقابل شکست رہے جبکہ ولیمسن نے 60 اور میک کولم نے وننگ شاٹ لگانے سمیت برق رفتار 49 رنز بنائے۔

اس میچ میں فتح کے ساتھ ہی نیوزی لینڈ نے پانچ میچوں کی سیریز میں 3-0 کی فیصلہ کن برتری حاصل کر لی ہے جہاں سیریز کا آخری میچ جمعہ کو ویلنگٹن میں کھیلا جائے گا۔

سنچری بنانے والے روس ٹیلر کو میچ کا بہترین کھلاڑی قرار دیا گیا۔

اس میچ میں شکست کے ساتھ ہی آسٹریلیا کے ساتھ پہلے نمبر پر موجود ہندوستان کی عالمی رینکنگ میں تنزلی ہو گئی ہے جہاں اس سے قبل آسٹریلیا اور عالمی چیمپیئن کے 117 پوائنٹس تھے۔